ايه الملل ده

هكتب عن ايه يا حسره كل يوم شبه التانى مافيش جديد لحد ما بقتش عارفه امبارح من النهارده وادى الدنيا ماشيه من عزه للنحوى لشاكى يا قلبى لا تحزن الحياه محتاجه شوية تشنج يعنى تغيير عقبال عندكواوعلى العموم التغيير جاى ونتيجة الميد تيرم هتطلع وهتبقى الفضيحه بجلاجل وبعدين امتحان الميد تيرم اكشن تالت مره والواحد ولا عارف يذاكر ولا نيله وشكلى كده هاخد شهادة خبره فى اعدادى دى والنبى ادعولى ربنا يهدينى ويسترها معايا ومن قدم شىء بيداه التقاه وهنيالك يا فاعل الخير والثواب
ايه الياس اللى انا فيه ده انا ملاحظه ان كل حاجه بكتبها تجيب الهم سبحان الله مع انى مش فقريه وما ببطلش ضحك الواحد شكله اتجنن وجاله الهسهس وعقله فوت ومش عارفه السبب من الكليه ولا من البيت ولا من الزمن اللى هيجنن الواحد
اللى عنده موضوع يشعر ببهجت يقولى عليه والنبى نفسى اكتب حاجه مهيسه

الثانويه العامه (ايام راحت)الحمد لله

ياعينى بنت خالتى لسه شيفاها النهارده بقت عامله زى عود القصب وهى لسه يادوب فى تانيه ثانوى امال لما تروح تالته هتبقى عامله ازاى اكيد مش هنشوفها مش هتبان من الارض فكرتنى بايام الهم والعذاب والمرمطه فى الشوارع من درس لدرس ياقلبى لا تحزن
يا عينى البنت بتشد فى شعرها وعماله تخبط فى قاسم امين اللى قارفها فى عيشتها وتقول هو السبب هو اللى نادى بتعليم البنات هو السبب فى اللى انا فيه ده خلاها كل ماتفتح صفحه فى الكتاب تلاقى سقراط والامام الغزالى (انا افكر اذا انا موجود اذا انا اعيش) واحنا ملنا ومال الكلام ده ياعينى اطعت فى قلبى
وبتدعى تدخل اى جامعه ان شاالله كلية تجاره
ربنا يكرمها ويخلصها على خير
معلش يا جماعه رجعتكوا لايام الهم اللى ارتحنا منها تقريبا يعنى ولو ان موضوع الراحه ده مشكوك فيه بس اهى طلعت كلمتين كانوا محشورين فى بلعومها
المواطنه المطحونه ايه

كوكب الشرق

اعظم سلام لاعظم صوت واحساس فى الدنيا (ام كلثوم)الصوت الذى عشقه الملايين الصوت الذى يحرك المشاعر والاحاسيس ويجعل الانسان يرقى بمخيلته وفكره مع اروع كلمات والحان كانغام العصافير وتغريد البلابل فكل اغنيه تروى حياه بمواقفها ومشاكلها ورقى احساسها
ولكن للاسف والالم والحسره اصبح من النادر ان يوجد احد يستمع لها واصبح معجبيها دقه قديمه او (مترب)زى مابيقولوا بس السبب واضح ولابس ميكرو جيب وبادى كت وبيرقص على (بحبك يا حمار)و(انا دانا)واغانى الميتال اللى بتجيب طرش وترفع الضغط وتجيب السكر.............الخ
وهي عباره عن قصه قصيره تافهه مليئه بالالفاظ السوقيه الدنيئه التى تثير اشمئزازى ويشعرنى بتدنى المستوى والذوق وكل حاجه راقيه
وطبعا كل هذا سبب مقنع ليجعل الناس تمل من اغانى ام كلثوم!!!!!!!!!!!!!!!!وغيرها فهى ليست مجرد شخص وانما هى تراث عريق لازم نحافظ عليه

كلام قوى بناء على طلب شمعتى

بين الاطلال

ليه كل شىء جميل يبقى اطلال وذكريات فاتت وعدت ليه كل اللحظات الحلوة نقول ياريت ترجع تانى ليه اوقات الفرح قصيره واوقات الحزن طويله مريره ليه كل ما نعرف ناس نسبهم ونعرف ناس تانيه
لما دخلت اعدادى اعد افتكر ابتدائى واصحابى اللى قضيت معاهم 5 سنين من عمرى وذكريات الطفوله البريئه وما كنتش اتخيل انى هسيبهم فى يوم من الايام
وقبل ما ادخل الجامعة كنت مش قادره اتخيل ازاى اسيب اصحاب اعدادى وثانوى اللى قضيت معاهم اجمل سنين عمرى ايام الضحك والهذار والتفكير فى الجامعة والمستقبل
ودلوقتى دخلت الجامعة وعرفت ناس وخت عليهم ويا عالم هفضل معاهم لحد امتى
واهو كل يوم من ده نعرف ناس ونسيب ناس

ماما عايزانى ابقى بنت

كل يوم الواحد يصحى ويلبس اى بلوفر والبنطلون الجينز وبلف الايشارب وانزل واتفرج على المشيه بالخطوة السريعة تقولوش عسكرى ولا لوا


ماما كل يوم تقولى كنت فكراك هتتغيرى لما تروحى الجامعة وهتغيرى لفة العواجيز دى وتعملى زى البنات اعت ابوص فى المرايا
وقلت لو عملت زى البنات لفيت الايشارب اسبانش وحطيت احمر واخضر ياترى كده هبقى بنت واعدت اضحك وقلت مش ممكن انا اعمل كده ده انا اخد تريئة ومش هسلم من كلامهم ولكن الزن على الودان امر من السحر
وقلت اجرب وساعات امام المرايه الف الطرحه من هنا تتفك من الناحيه التانيه والدبابيس ترشق فى نفوخى لحد ما دماغى بقت مصفه نزلت الشارع اول مره بالنيو لوك وحاسه انى شايله طاجن ستى فوق دماغى واعد افكر فى كل التعليقات السخيفه اللى هتنزل عليه زي الرصاص ولكن ربنا ستر بس ماعرفش اذا كانت مجامله ولا حقيقه ولعل التغير يقلل الملل شويه

هوه فى ايه

هوه فيه ايه الزهق يحيطنى من جميع الجهات مش عايزه اعمل اى حاجه مش عايزه اذاكر مش عايزه افكر مش مرتاحه نفسى فى اى تغيير من كتر الزهق ما ببطلش ضحك شكلى اتجننت ومحتاجه لدكتور وفجأة بعد ضحك متواصل وبدون سابق انذار بلبس جلبية الهم وعلى رأى المطرب العالمى والشاعر المبدع سعد الصغير (اتخنقت لأ زهقت من الحياه ومن اللى فيها والبيت واللى فيه )بس خلاص

كلاكيت ثالث مرة

كلاكيت تالت مرة لانه تالت بلوج اعمله بعد فشل زريع فى ايجاد البلوجين اللى راحوا بد ما نسيت الباس وورد لكن وراه والزمن طويل يا

البلوج يخلص عليه يا هخلص عليه