عقبالكوا

كان فرح حلو جدا كان هنا ف القاهره مع ان العريس والعروسه من السويس

نقو ل ايه غاويين شحططه بس كويس العيله كلها كانت موجوده ناس كتيير بيدعوا انهم ارايبى

مع انى عمرى ما شفتهم

المهم ان الفرح كان فى مكان اسمه قاعة الحرب الالكترونيه تقريبا الاسم كده

بس مكان جميل اوى

شمال خايفه على اللى فوق دماغها يقع مع انه كان مثبت بحوالى 30 دبوس خرموا دماغى يلا المهم بقى كنا تقريبا اول ناس نوصل بعد مامة العريس واخته وشوية ناس كده وطبعا صحبتنا انا يعنى مش عارفه تتحرك لا يمين ولا

بس بقه وبعدين العريس والعروسه جم وكنت متشوقه اشوف العروسه لانى ما اعرفهاش

عشان انا قريبة العريس

بس كان العريس احلى بكتييييييييييييييييييييييييييير

وابتدت الزفه وان العروس تتحرك ابدا وطبعا بتحياتى الخاصه سمعت اخت العروسه بتقولها

ارقصى يا بنتى اتحركى التانيه تقولها

مابعرفش راحت اختها قلتلها طب اعملى زيي

ياعينى على الماساه صعبت عليا

بس ما كنتش محتاجه تتعب نفسها البنات اللى ف الفرح عملوا الواجب وزياده شويه ربنا يديهم الصحه

والعبده لله اعده ببص على اللى رايح واللى جاى

استغفر الله العظيم

بس كان تقريبا 95% من الفرح زمالكويه

خلص الفرح الساعه1:30 ص

وكنا هنكمل بقيت السهره فى وسط البلد بس روحنا بقى كفايه كده

الحمد لله كان فرح حلو وتم على خير

وعقبالكوا كلكوا

محلات وسط البلد

لحسن الحظ عندنا فرح بكره جه فى وقته يمكن ابقى احسن حالا

طبعا بقالى اسبوع بجهز عرفت يوم الجمعه اللى قبل اللى فات ان فى فرح وكان لسه عندى امتحانات واول لما خلصت نزلت ادور

على لبس فى الهرم انى الاقى ابدا مافيش حاجه راضيه تيجى مقاسى قست طقم كان حلو بس فيه مشكله بسيطه

ما كنش على قدى مع انه كان جميل رحت سبت المحل وخرجت وقررت لو ملقتش لبس النهارده مش هروح

المهم الحمد لله ما لقتش ورجعنا بخف حنين

وتانى يوم نزلت وسط البلد ما سبتش فيها محل لا انا ولا خلود اختى وخلاص كنا مروحين بس النصيب اخر محل دخلناه كنت ببص

على فستان لكن فجاه لقيت تايير ماما ادت واحد ليه وواحد لخلود واللى هاييجى على قده هياخده

والحمد لله جه على قدى وخته

بس المفجأه الكبرى

بعد لما رجعنا جيه تليفون الو مين ................الفرح اتلغى لااااااااااااااااااااااااه

بعد كل ده حرام طب ليه

وبعدين يا رب بقى ده انا رجلى اكسرت يارب المشكله تتحل طب هنرجع الهدوم ولا ايه دى ما تتلبس الا فى فرح حرام والله امال بيستعجلوا ويقولولنا ليه بس

وتانى يوم التليفون رن الفرح زى ما هو يوم الخميس

ياسلام قلبى ارتاح

ونزلت اكمل بقيت اللبس من ايشارب واكسسسوارات ومانيكير

هو انا شويه ولا ايه

شوفته بقى البنات بتتعب ازاى مش لو كنا ولاد كان قميص وبنطلون وحلينا المشكله

بس ربنا يسطر وما يجيش تليفون النهارده كمان

ويارب اخرج من الكابه دى بقى

مفيش مشكله

ياااه ده انا طلعت غلطانه بشكل وحش ومفتريه ما الدنيا طلعت حلوه اهه وجميله وانا اللى كنت ما بفهمش كل حاجه الواحد عايزها بيلاقيها ادامه قبل ما يتكلم حتى الحياه بمبى ووردى وكل الالوان ما عدا الاسود طبعا اسود ايه بس فى الجنينه دى لامشاكل ولاضيقه ولا حاجه ابدا ولاحد بيغصبك على حاجه ولا بتعمل حاجه انت مش عايزها كل القرارات فى ايدى وسهل تنفيذها لالا ده انا كنت مفتريه فعلا ده انا حتى بالمناسبه السعيده دى الخاليه من المشاكل افتكرت اغنية الحياه حلوه بس نفهمها

انا ما عنديش غير مشكله واحده بس بتؤرقنى وتعبانى خالص خالص يا ترى هتكون ايه؟

هيه بالنسبه لى مشكله عويصه وهى الحر الجو الحر بيخلينى مش طايقه نفسى ومش طايقه حد

لكن فى الشتا ببقى خاليه من المشاكل تماما

خيوط عنكبوت

ايه العنوان ده ؟ مش عارفه فجاه جه ف دماغى يمكن لانه بيوصف مدى شعورى يعنى خيوط عنكبوت ولا رجلين اخطبوط كلها ف الاخر خنقه واحده لا هيه مش خنقه هيه كتمه لا برده كتمة ايه ؟دى حاجه واقفه فى قلبى يمكن ضيقه خوف ضعف حاجه من هذا القبيل خيوط بتلف حولين رقبتى ودماغى بقى عندى شعور دائم ان الدنيا قربت تخلص مع ان يمكن لسه الحياه ما ابتدش دماغى شغاله 24/24
تعبت و صد عت نفسى ابقى واحده تانيه او حد يدينى دماغه شويه يمكن استريح بصراحه مش عارفه اقول ايه تانى هو نفس الكلام ده انا زهقت

افراج

افرااااااااااااااااااااااااااااااااج وخلصنا امتحانات بعد عذاب دام مده طويله ربنا يستر على النتيجه

وكان نفسي اكتب القسم اللى انا عيزاه بس للاسف حكم السلطات العليا

المهم انها كانت سنه غريبه اوى عرفت ناس كتير وحكاىات اكتر بس الحمد لله طلعت باخوات بكل ما تحمله الكلمه من معنى وليس مجرد تعبير مجازى اخوات يخافوا عليا وينصحونى ويسمعونى فى جدى وضحكى وتهييسى وانا بقول ليهم كلهم ما تزعلوش منى فى اى حاجه عملتها غصب عنى او بقصدى والله يكون فى عونهم انهم استحملونى واستحملوا ارفىوربنا يخليهم وارفهم كده علطول ويارب كل واحد يحقق اللى نفسه فيه وربنا يهدينا كلنا ويكرمنا